Eph 4 | NdeIBE | STEP | Ngakho, njengesibotshwa seNkosi, ngiyalincenga ukuba liphile impilo efanele ukubizwa elakwamukelayo.

Ephesians 4

Ukumanyana Emzimbeni KaKhristu

1 Ngakho, njengesibotshwa seNkosi, ngiyalincenga ukuba liphile impilo efanele ukubizwa elakwamukelayo. 2 Wobani ngabathobekileyo labamnene okupheleleyo; bekezelani, libekezelelane ethandweni. 3 Zamani ngamandla wonke ukugcina ukumanyana kukaMoya ngesibopho sokuthula. 4 Kulomzimba munye loMoya munye – njengalokhu labizelwa ethembeni linye ekubizweni kwenu – 5 iNkosi yinye, lokholo lunye, umbhaphathizo munye;

6 uNkulunkulu munye uYise wabo bonke, ophezu kwabo bonke, ongabo bonke njalo okubo bonke.

7 Kodwa yilowo lalowo wethu waphiwa umusa ngokwaba kukaKhristu.

8 Yikho nje umbhalo usithi: “Ekwenyukeleni kwakhe phezulu wahola izithunjwa edwendweni lwakhe njalo wanika izipho ebantwini.”

9 (Ukuthi “wenyuka” kutshoni ngaphandle kokuthi njalo wehlela lezigabeni zangaphansi komhlaba na? 10 Yena lowo owehlela phansi nguye kanye owenyukela phezulu kakhulu kulamazulu wonke, ukuze agcwale izindawo zonke emhlabeni lasezulwini.) 11 Nguye owanika abanye ukuba babe ngabaphostoli, abanye babe ngabaphrofethi, abanye babe ngabavangeli, abanye babe ngabaphathi labanye babe ngabafundisi, 12 ukuba balungisele abantu bakaNkulunkulu imisebenzi yenkonzo, ukuze umzimba kaKhristu wakhiwe

13 sonke size sifinyelele ekumanyaneni ekukholweni lasekwazini iNdodana kaNkulunkulu sikhule okugcweleyo, sithole isilinganiso sokuphelela okufunyanwa kuKhristu.

14 Ngakho kasisayikuba yizingane, siphoswa emuva laphambili ngamagagasi, siphetshulwa lapha lalaphaya yimimoya yonke yokufundisa kanye lokuhlakanipha lobuqili babantu ngamasu abo enkohliso. 15 Kodwa-ke, sikhuluma iqiniso ngothando, sizakhula ezintweni zonke kuye yena oyiNhloko, lowo nguKhristu.

16 Kusukela kuye umzimba wonke, ohlanganiswe wabanjaniswa yimisipha yonke ewusekelayo, uyakhula uzakhe ngothando, isitho ngasinye sisenza umsebenzi waso.

Ukuphila Njengabantwana Bokukhanya

17 Ngakho ngilitshela lokhu, ngikugcizelela eNkosini, ukuba akumelanga liphile njengabezizweni, emicabangweni yabo eyize.

18 Kubamnyama ekuqedisiseni kwabo njalo behlukene lokuphila kukaNkulunkulu ngenxa yokungazi kwabo okungenxa yobulukhuni bezinhliziyo zabo. 19 Sebelahlekelwe yisazela sonke, sebezinikele ekuthokoziseni umzimba ukuze benze izinhlobo zonke zokuxhwala, inkanuko iqhubeka ifuna okunengi.

20 Kodwa lina uKhristu kalimazanga ngaleyondlela. 21 Impela lezwa ngaye lafundiswa ngaye ngokumayelana leqiniso elikuJesu.

22 Mayelana lendlela yenu yakuqala yokuphila, lafundiswa ukuba lilahle uqobo lwenu oludala, olonakaliswa yizinkanuko zalo zenkohliso;

23 lenziwe libe batsha esimeni sezingqondo zenu; 24 lifake ubumina obutsha, obadalelwa ukuba njengoNkulunkulu ekulungeni okuqotho lobungcwele.

25 Ngakho-ke, yilowo lalowo wenu kumele alahle amanga akhulume iqiniso kumakhelwane wakhe, ngoba sonke siyizitho zomzimba munye. 26 Ekuthukutheleni kwenu lingenzi isono: Ilanga kalingatshoni lilokhu lithukuthele,

27 njalo lingamniki uSathane indawo yokugxila.

28 Lowo obekade entshontsha kangantshontshi futhi, kodwa kumele asebenze, enze ulutho olusizayo ngezandla zakhe, ukuze abe langakwabela abaswelayo.

29 Akungabi lenkulumo embi ephuma emilonyeni yenu, kodwa okusizayo ekwakheni abanye mayelana leziswelo zabo, ukuba kusize labo abalalelayo. 30 Njalo lingamdabukisi uMoya oNgcwele kaNkulunkulu, elabekwa ngaye uphawu lwelanga lokuhlengwa. 31 Susani yonke inzondo, lokuthukuthela, lolaka, lokuxabana lesinyeyo, kanye lobubi bonke. 32 Wobani lomusa lozwelo omunye komunye, lithethelelane njengalokhu uNkulunkulu walithethelela ngoKhristu.